Ғүмер бир тип һорамайым, Раббым,
Һорайым тик доға - күберәк,
Өлгөрһәмсе гөнаһ ярлыҡатып
Ҡаҡмай башлағансы был йөрәк.
Изге исемдәрең оҙағыраҡ
Төшмәһәсе тием телемдән,
Тетрәп ҡурҡам Һинһеҙ йәшәүемдән,
Ҡурҡам йәнә Һинһеҙ үлемдән.
Ғүмер юлын насип ҡылсы, Раббым,
Тулы иман менән үтерлек,
Уйым, телем, ғәмәлдәрем менән
Һине ризалатып китерлек
Биргәнеңә мең-мең шөкөр ҡылам,
Бары һиңә генә тәкбирем
Оҙон ғүмер һорамайым, Раббым,
Хәйерлеһен бирсе тәҡдирҙең.